近日好多動/漫畫改編電影排隊等住上畫，你有何心水，《X-men》還是《Superman》呢？這些大片當然叫人期待，但大家最想想的可能是剛在日本上映的《小丸子》真人版吧﹗香港上映無期，但網上近日已廣為流傳，隔離手電小丸子Ernus更已率先試睇，仲讚口不絕添﹗不過講想睇，最想睇的其實是《魁﹗天兵高校》真人版，呢套05年頭上畫的真人動畫電影，從來唔敢奢望香港會上，不過誓估唔到《魁﹗》居然有DVD出，仲要香港有得買，托上托上托之後，《魁》終於到手，睇cover，人物造型不俗，最似當然仲係機器澤啦﹗可惜因為趕稿未有時間睇，未知質素如何，不過於這個假期中，唔理有幾忙，點都會煲佢先，想知買唔買得過，記得等我的「碟評」喇﹗（加代）

雖然香港都已經開了UNIQLO，但當初希望愈大，到後來開張排隊就失望更大，那些貨色……唔好玩啦﹗因此雖常出沒於老尖，但就甚少上UNIQLO巡視業務，直至近日大手入來過100款 tee，卒之真係做到件好事，聞風火速上去掃貨，亦真不負所望，個購物籃火速已被近10件填滿。最驚喜還是今次卒之引入漫畫家系列，之前的叮噹同井上雄彥雖然返唔到，但最新的荒木飛呂彥卻入到貨，黑&深灰加燙銀 print，真係靚到裂，都仲係$100有找，係質地差少少擺明一季貨仔，但即使荒淫地穿一件儲一件都負擔得起，實在搵唔到唔買的理由。

荒木飛呂彥 + UNQLO tee，唔記得$79定$99，但都好抵買。
(36850.jpg )

上期《東TOUCH》FUTSAL WEEKLY同大家報道了港大vs科化成人的一場賽事，話說比賽當日有位小球迷於場外睇得相當肉緊，不停為港大隊伍吶喊助威，原來呢位小朋友係港大領隊兼FUTSAL球場負責人鄺sir愛兒。9歲的梓軒自香港引入FUTSAL以來就接觸呢項運動，屬青少年足球訓練精英班之學員，上年暑假佢仲去埋日本同的足球學生交流技術。「我好鍾意足球，最欣賞球星係施丹同朗拿甸奴。我學FUTSAL係自己的決定，絕對唔係爸爸迫，不過平時爸爸同教練都講好多FUTSAL知識俾我聽。」話口未完，梓軒就於場邊搓波，仲表演佢美妙轉身俾大家睇添！睇來下次FUTSAL教室唔搵甲組球員示範可以考慮搵佢喎！(原本叫Kitty，但又被叫蝦毛，現叫吉吉的人)

FUTSAL KID玉照

盤球英姿

中文版《滾石》推出不足一個月就被上海新聞出版管理單位勒令停刊，筆者實在百思莫解，一本只講音樂和政治扯不上甚麼關係的雜誌亦落得如此下場，就算找上崔健作訪問，但閱讀後大部分內容只屬於對搖滾的感覺，一個很普通的訪問，可惜近期遇上國內對傳媒的封殺，《滾石》亦成為陪葬品，居安思危，香港傳媒真係要好好反省。  ( 穆林)

近日行玩具店買得最多唔係甚麼figure同搪膠，而係一堆木製玩具，咁並唔代表我個人反璞歸真，只係細佬我個荷包近日好「清新」，轉攻平價市場而矣﹗不過平還平，好多木製玩具都好出色，時鐘同俾小孩記形狀的積木火車手工上色樸實，木製「元祖」爆旋陀螺同劍玉球，更可以玩到一日。不過講到最滿意，都係個1/6迷你豎琴，可以俾我cosplay《星矢》中的琴座同瑤光星之外，襯阿Jack就更係絕配，又一次證明快樂並不須太花錢，不過我都仍堅信花錢可以更快樂。（加代）

左起為時鐘、「元祖」爆旋陀螺同畀小童記形狀的積木火車，劍玉帶了回家苦練，今次冇緣同大家打招呼﹗

最滿意收穫：1/6豎琴。

很久沒有看見村上的新作，近日路過Page One，忽然被我發現新作《東京奇譚集》，終於忍不住買了回家。老實說，村上的短篇作品比較來得輕鬆幽默，不像長篇氣氛沉重(《世界末日與冷酷異境》除外)，今次最新作品中，最令人喜出望外可算是「品川猴」，結局有點像電影《玩謝麥高維》的感覺。而另一故事「日日移動的腎形石」就像《人造星情人》女主角一樣，行為令人難以觸摸，雖然今次短篇只得5篇，不過對於一眾村上書迷來說，已經心滿意足了。

(32929.jpg )

身邊的朋友可能覺得我只係應該同NDS有關係，因為見親我無論玩定講，都只會係NDS的遊戲，不過最近奪取了PSP後，就把NDS丟在一旁，專心玩一隻名不經傳的《XI Coliseum》，呢個遊戲玩法好簡單而且有點重覆性，不過一玩起上，就好似以前玩《俄羅斯方塊》咁，不能自拔，其實當年在PS2上已經中毒已深，久別重逢，又再次令我毒海翻波。不過諗諗下，PSP上面我覺得好玩game，都不過係翻炒PS2之作，多了的只是便攜性，唉。
ernus
(32928.jpg )