前兩日終於一嘗親手把玩Sony Ericsson W900i及P990i的機會，前者已有9成以上接近final，後者則只得個殼ok，軟件方面還距完成階段頗有一段時間，所以質素未能作準。單講W900i，真可謂由外正到內再正翻出外面，試玩感覺好到不得了，相信推出時必能大賣，但估計定價應該至少摸住5千，個人而言就唔太捨得。現已將W900i數張試相及1段短片，上存至TOUCHers’ blog內，大家可上網睇睇，尤其要體驗一下那段每秒30格的短片，認真流暢非常。(請親覽多媒體內的W900i試相）

(微距拍攝 - 17573.jpg )

PKai

2005-11-19  04:04:12

由智海、小克、阿德、Eric So及阿齋聯合推出的漫畫結集，一如所料地出唔切，最快都要年底先出版。不過人又豈可完全地言而無信？承諾搞的立體展，即日起已於尖沙咀彌敦道23號彩星中心地庫Fabrica（至12月30日止，星期日至四10:00~21:30，星期五及六10:00~22:00）展出，有小克「維港巨星」系列中的1:1中央呀﹗fans實應速去。5人組set up會場短片，即將上載，敬請留意。

加代

2005-10-29  16:06:02

PSP行貨終於跌價，由原本＄1,980，調整為＄1,780，未買的朋友的確係時候入貨喇！不過在11月17日會推出一個包1GB Memory Stick PRO Duo的「GIGA PACK 」，都只係賣$2,180，而PSP仲係最新的2.50版本，聽落好似好抵！
但如果你對NDS都有興趣的話，咁就認真要諗清楚喇，唔怕話過你知，從12月開始，NDS會有一連串好game推出，《Mario Kart DS》、《BIOHAZARD:Deadly Silence》都可以話係必玩，由其係《Mario  DS》可8人同時對戰，相信到時會掀起一個Kart仔熱潮，仲必定會勁過任天狗添！

凝空

2005-10-29  06:10:13

早排香港大學發生了一單好懸疑的小新聞，雖則事件應該都係些無聊人的惡作劇，之但係無論校方、學生會又或者普通學生上上下下都覺得呢件事好離譜……
話說上個禮拜某個清晨，港大校園的壁報板被人撕爛晒，搞到遍地垃圾之餘，最大那堆仲要放了在學校最神聖的國殤之柱正前面，簡直就係一種侮辱。最令人感到奇怪係好多壁報板被人搗亂完之後，上面仲貼了張報紙，張報紙上面大大隻咁寫住「save the forests」，好似擺到明話畀人聽所有的事都係為「環保」而做，但明眼人一睇就知係有人借「環保」之名作反。事後校方加強了半夜的保安工作，學生會第二日亦發晒電郵畀全校同學尋「兇」，但至今都仲係乜消息都冇。
小妹而家在這裏向廣大市民作出呼籲，任何人士於上個星期曾經在港大校園目睹有可疑人士意圖破壞壁報板或手持大量紙張，請即留言，多謝合作！

Kitty

2005-10-29  06:02:15

漫畫接龍繼由Eric So操刀的第一期《冰糖葫蘆》後，第二期由阿怪Hing仔接住上，故事名為《蝴蝶死了》……至於第三期又由哪位接力，請留意下星期連載。

P.S 第一及第二期的漫畫接龍已上載至多媒體中。

早陣子在公司出現了一個扭計骰，技癢癢兼在同事們慫恿下，決定將它還原。這個在80年代盛極一時的玩意，現在「二字尾三字頭」的kidult相信無人不識，但我當年年紀小，還未學會將它還原，今日惟有在網上尋找solution。

上網後發現原來現在的扭計不止元祖的款式，還有4×4×4的Rubik’s revenge、5×5×5的Rubik’s professor，還有些像連體嬰的款式，心中暗想：「點玩呀？」之不過你玩唔掂，大把人玩到，仲玩得好快。還原扭計骰的世界紀錄（非官方）是12.11秒，有冇搞錯呀？我連一行（唔係一面）都未扭完啦！而Rubik’s revenge的還原紀錄則是55.38秒、Rubik’s professor是1分51.41秒。另外還有些勁無聊的紀錄，例如單手玩的紀錄是23.76秒、用腳玩的紀錄是2分14.33秒、幪眼玩的紀錄是1分58.32秒……

如果你睇完以上紀錄，覺得唔係好勁，我極力提議你參加今年的「Rubik’s World Champion 2005」。適逢今年扭計骰誕生25周年，比賽會於11月5日-6日於Florida Disneyland搞，獎金絕對唔豐富，但比賽之餘可以順道去那個大得多迪士尼玩嘛。

想參加可到http://www.rubiks.com睇睇，仲未截止！

圖：從左至右為 rubik’s revenge, rubik’s professor, rubik’s fusion, rubik’s triamese

因為同《春卷》5人合作的漫畫接龍系列搞了很長時間，更曾在V41期訪問中披露了這計劃，相信有留意開的讀者都會知道發生緊乜事，所以在V42期的第一回，Eric So操刀的《冰糖葫蘆》中，遂掉以輕心冇加以解說，令不少人看得一頭霧水，實在是萬死不足以抵此罪。不過亡羊補牢，今期已加上少許說明外，更請得了主筆的准許，由本星期起，將每期各大創作人的作品分批上載到blog上讓更多人分享，所以大家除了要每期買《東TOUCH》看看是那位創作人接故事外，也記得要上blog看看﹗

加代

2005-10-22  00:17:25

（PKai按：原圖請到「多媒體」欄內的漫畫接龍欣賞。）